Maskinelt utlese med KI frå Austrheim sine offentlege møteprotokollar.
Dette er eit uttrekk under utprøving, ikkje ein protokoll: det inneheld
feil, og tal må kontrollerast mot kjelda før dei blir brukte.
Kor sikre tala er
PS 130/23 Handlings- og økonomiplan 2024-2027 og budsjett 2024
Eldrebustadar må byggjast dei neste åra både på Kaland og Årås. Me ber om at det vert laga planar for å byggja inntil 20 bustadar med livslaupsstandard i perioden 2024 – 2026. Bustadane vil bli bygd av private firma og kan bli seld til private, til burettslag eller bli brukt som kommunale utleigebustadar. 20 bueiningar vil kosta om lag 50 millionar kroner inkludert meirverdiavgift. Dei to prosjekta skal vera sjølvfinansierande og ikkje belasta det kommunale driftsbudsjettet. Kommunedirektøren kjem tilbake til politisk med ei utgreidd sak om dette.
Disposisjons- og næringsfond. Eventuelt mindreforbruk på årets driftsbudsjett skal setjast av på disposisjonsfondet og på eit eige næringsfond som først og fremst skal rettast mot primærnæringane.
Ny sjukeheim. Inntekter frå sal av kommunale eigedommar skal setjast av på eit fond til ny sjukeheim.
SFO-betalinga vert redusert med 25% for 3. og 4. klasse, altså frå 3310 kr per månad for 14 timar til 2482 kr. Reduksjonen er på 828 kr per månad. Dette vil truleg kosta oss i underkant av 400.000,- kroner i året. Me ber om at dette vert innført frå 1. august og at kostnadane på rundt 200.000 kroner i 2024 vert dekka inn gjennom budsjettjusteringar for dei to skulane.
Austrheim sokneråd ber om meir driftsmidlar. Ut frå kommunen sin økonomiske situasjon finn me det ikkje forsvarleg å gje soknerådet alt dei ber om, men me ønskjer likevel å auka driftstilskotet med 250.000,- kroner til 3,82 millionar kroner. Desse dekkjer me inn ved å redusera driftsutgiftene i helse og velferd med ein tilsvarande sum.
Furuly. Vidare støtte til Stiftinga Furuly Eldresenter vart i fjor utsett til revideringa av budsjettet i år, men har ikkje vore på sakslista. (Sak frå budsjettmøtet i 2022).
Vassavgift for naust og bryggjer: Tilkoplingsavgift for naust og enkle sjøbuer, uinnreidde, vert sett til 10% av bustad, hytte under 90 m2. For bryggjeanlegg og marinaer blir tilkoplingsavgifta sett til kr 500,- per båtplass. Årsavgifta vert for naust og enkle sjøbuer sett til 10% av bustad/hytte under 90 m2 og for bryggjeanlegg og marinaer vert denne sett kr 50,- per båtplass. Store bryggjeanlegg og marinaer (meir enn 20 båtplassar) skal ha vassmålar og betala avgift etter forbruk. Amnestiet som gjeld ut året bør forlengjast til 1. juli 2024. (Sak frå budsjettvedtaket i 2019, verbaldelen).
Energisparing. På grunn av høge kostnader på straum og gass, må kommunedirektøren snarast vurdera om det bør investerast i geovarme på kommunehuset, Årås skule med idrettsanlegg og Nordliheimen eller setjast i gang andre energisparande tiltak i tråd med energikartlegginga som blir utført på våre mest sentrale bygg. Me ber også kommunedirektøren vurdera om lysanlegga på idrettsparken bør erstattast med meir energivenlege anlegg. Det same bør gjerast for veglys og lys på kommunale parkeringsplassar og liknande.
Sjukefråvær. Lønskostnadane er dei desidert største kostnadane i ein kommune. Historisk har Austrheim kommune hatt eit lågt sjukefråvær, men i samband med pandemien har dette biletet endra seg drastisk. Me ber om at kommunedirektøren i 2024 prioriterer og forsterkar arbeidet med å få ned sjukefråværet i kommunen. Viss ein kjem ned att på det nivået Austrheim kommune tradisjonelt har vore på når det gjeld sjukefråvær, vil det vera store pengar å spare.
Lærlingar. Kommunedirektøren vil halvera talet på lærlingar og TAF-elevar i framtida. Me vil åtvara mot ein så drastisk reduksjon og peika på kor viktige lærlingane våre er for at kommunen skal få rekruttert nok fagarbeidarar i framtida. I tillegg er det svært viktig for Austrheim vidaregåande skule at vertskommunen bidreg med både praksis- og lærlingplassar til dei utdanningstilboda skulen har. Lærlingane gjer elles ein fantastisk jobb og bidreg positivt til arbeidsmiljøet i dei einingane dei jobbar. Me meiner at Austrheim kommune til ei kvar tid bør ha minst 12 TAF-elevar og lærlingar i sine einingar
Arbeidssenter med meir. Me ber om at kommunedirektøren undersøkjer om det er ledige lokale i rimeleg avstand frå Vestlia som kan nyttast til Arbeidssenter og til dømes BUA, møtestad for frivillige lag og organisasjonar, vev-stove og utstillingslokale for brukarane av Kunsthuset osv. Me ber om at kommunestyret får ei sak om dette så raskt som mogeleg. Denne saka kan sjåast i samanheng med at me ber kommunedirektøren kartleggja det lokale transportbehovet i kommunen. Tilsette på Arbeidssenteret ber også om å få disponere ein bil i arbeidstida, samt om midlar til å kjøpa inn utstyr til dei aktivitetane dei driv på Arbeidssenteret. Me ber om at kommunedirektøren sikrar dette.
Utfall: vedteke · Presisjon: samroystes
Ingen partifordeling registrert — sjå råteksten under.