Ofte stilte spørsmål

Kva er dette?

Alt kommunane vedtek, står i møteprotokollane deira, og alle protokollane er offentlege. Men dei ligg som PDF-ar spreidde over hundrevis av møte, og ingen av dei fortel deg kva eit parti har gjort over tid. I praksis er det difor uråd for ein vanleg innbyggjar å svare på spørsmålet «røysta partiet mitt for å leggje ned skulen min?».

Denne sida gjer dei PDF-ane søkbare og viser kven som røysta kva — med protokollteksten ordrett ved sida av kvart einaste tal, so du kan sjå sjølv kva kjelda faktisk skreiv.

Kvar kjem dataa frå?

Frå kommunane sine eigne offentlege innsynsportalar — dei same protokoll-PDF-ane som ligg ute der. Vi lagrar lenkja til PDF-en saman med kvar røysting, so du kjem til originaldokumentet frå kvart tal på sida. Ingenting her er henta frå ei anna kjelde. Nokre få tal er utleidde frå det protokollen skreiv — og dei er merkte som det, kvar for seg.

Er dette laga av KI — kan eg stole på det?

Uttrekket er maskinelt: ein språkmodell les protokollteksten og plukkar ut kven som røysta kva. Men all tekst du ser er sitert frå protokollen. Modellen hentar ut — han skriv aldri. Står det ikkje i protokollen, står det ikkje her.

Feil kan likevel førekome. Difor står råteksten alltid framme ved sida av tala: han er fasiten, ikkje vår gjengiving. Går tala ikkje opp, seier sida frå om det i staden for å pynte på det.

Kvifor manglar saker frå kommunen min?

Dekninga er ujamn. Nokre utval er berre delvis gjennomgåtte, møte utan publisert protokoll er ikkje med i det heile, og somme saker har ingen voteringstekst å hente ut. Kor langt vi er kome i akkurat din kommune, står på «Korleis dette er laga» — sida kvar kommune har si eiga av, med tal talde frå datagrunnlaget kvar gong ho vert vist. Vel kommunen din for å kome dit.

Kva tyder «utleidd frå namn» og «følgjer av totalen»?

Kvar partistemme har ei kjelde, og merkelappen fortel kva slag. Eksplisitt tyder at protokollen sjølv oppgir talet. Utleidd frå namn tyder at protokollen berre listar namngjevne representantar, og at partitalet er talt opp frå den lista — eit ekstra steg som kan bomme om eit namn er stava feil eller ikkje kjent att.

Følgjer av totalen — protokollen skreiv ikkje talet tyder at partiet er nemnt i oppteljinga utan at talet står der, og at talet er det einaste som får rekneskapen til å gå opp. Det er då merkt som utleidd i staden for å gå for eit tal kjelda oppgav. Går ikkje residualen opp, vert partiet ikkje ført opp i det heile, og røystinga står som uklar.

Kvifor kan eg ikkje sjå kva ein einskild representant røysta?

Sida viser parti, ikkje namn. Namn står berre i den siterte råteksten frå protokollen — der protokollen sjølv listar dei — og vert ikkje bygde om til noka oversikt per person.

Kva kommunar er med, og kjem det fleire?

Kommunane som er lesne inn no, står på framsida. Dette er ein test av metoden, ikkje eit utval av kommunar vi meiner er interessante. Ein kommune til på same innsynsportal er berre ei konfigurasjonsfil; ein annan portal krev ny kode fyrst. Sjølve uttrekket er likt uansett.

Finst det eit API?

Ja. Det er ope og gratis no, og dokumentasjonen ligg her med døme du kan kopiere rett inn.

Å hente protokollar, køyre uttrekk og halde tenesta oppe kostar pengar. Det kan difor hende at API-et blir ei betalt teneste seinare. Vi lovar ikkje at det alltid vil vere gratis, og vi har ingen planar om å stengje det i morgon — dette er berre sagt rett ut, so ingen byggjer noko på ein føresetnad vi ikkje har gjeve.

Eg har funne ein feil — kva gjer eg?

Sjekk fyrst råteksten og PDF-lenkja som står ved røystinga: dei viser kva protokollen faktisk skreiv, og skil ein uttrekksfeil frå ei kjelde som sjølv er uklar eller feil. Er det uttrekket som bommar, er det den protokollen, saka og røystinga det gjeld som må til for at feilen skal kunne rettast — adressa til saka held på alt saman.

Send meldinga til hei@hvemstemte.no, og ta med adressa til saka det gjeld — ho identifiserer protokollen, saka og røystinga i eitt, so feilen kan finnast att og rettast.